Бишкекте 15-январдан баштап “Күлкү тамаша гезити” чыгарыла баштады. Гезиттин учурда төрт кызматкери бар.
Карикатурага бай гезит “KTG” (Күлкү тамаша гезити) деп аталат. Гезит аптасына чыгарыла турганын айтты негиздөөчүлөрүнүн бири Төлөбек Нурдинов.
Тамашалуу гезит 16 беттен турат. Анда ар кандай окуяларды, өлкөдө жана дүйнөдө болгон соңку кабарлардын тамашалуу түрүн окууга болот.
“Башка гезиттерден айырмаланганга аракет кылып кагазын, жазууларын, гезиттин өлчөмүн өзгөчө кылдык. Көнүмүш адаттардан алысыраак болуп, коомдогу окуяларды элге негативдүү эмес, позитивдүү жактан карап берели дедик”, — деп токтолду Нурдинов.
Гезиттин алгачкы номери беш миң нуска менен чыгарылган. Ал учурда Бишкек шаарынын аймагында окурмандарга сунушталууда.
“Азырынча жаңыдан чыга баштагандыктан Кыргызстандын облустарына жана айылдарына тарай элек. Бирок максатыбыз — бардык аймактарга жеткирүү. Айылдагы журналист эмес жөнөкөй адамдар бизге жаңылык айтышса, алардын да жаңылыгын гезитке жазабыз”, — деп билдирди KTGнын негиздөөчүлөрүнүн бири Нурдинов.
Чыгымдын баарын өз чөнтөгүнөн чыгарышкан. “Канча акча сарпталгандыгын айтпай эле коёлу”, — деди ал.
Сурамжылоо: Карикатура гезитинин чыкканына кандай ойдосуз?
Авторлор: Кызжибек Кушбакова, Самара Рыскелди кызы